Степногорскіде балалардың көзінше төбелескен бапкерлер жазаға тартылды, - деп хабарлайды aqshamnews.kz тілшісі.
Оқиға балалар арасындағы грэпплинг турнирі кезінде болған.
Желіде тараған бейнежазбада бірнеше ер адамның сөзге келіп, бір-бірін итеріп жатқаны көрінеді. Оларды ажыратуға ата-аналар мен турнирге қатысушылар араласқан.
Тексеру нәтижесінде полиция ҚР Әкімшілік құқықбұзушылық туралы кодекстің 434-бабының 1-бөлігі ("Ұсақ бұзақылық") бойынша іс қозғады.
"С. және Ш. қалалық турнир кезінде бейәдеп сөздер айтып, қоғамдық тәртіп пен айналадағы адамдардың тыныштығын бұзатын, құрметсіздік білдіретін әрекеттер жасаған", – делінген сот қаулысында.
Сот отырысы барысында екі бапкер де кінәсін мойындап, кешірім сұрап, қатаң жаза қолданбауды өтінген.
"Сот қаулысымен С. мен Ш. кінәлі деп танылып, әрқайсысына 78 640 теңге көлемінде айыппұл салынды", – деп мәлім етті сотта.
Сот актілері әзірге заңды күшіне енген жоқ.