Алматы қаласында мемлекет және қоғам қайраткері, Қазақстанның Еңбек Ері, Халық жазушысы, көрнекті ақын Олжас Сүлейменовтің 90 жылдық мерейтойына арналған салтанатты концерттік кеш ұйымдастырылды, – деп хабарлайды aqshamnews.kz тілшісі.
Іс-шара Алматы қаласы әкімдігінің қолдауымен өтті.
Салтанатты жиынға зиялы қауым өкілдері, ақын-жазушылар, мәдениет қайраткерлері, студенттер мен қала тұрғындары жиналды. Кештің басты мақсаты – қазақ руханиятының биік тұлғасына айналған Олжас Сүлейменовтің әдеби және қоғамдық еңбегін ұлықтау болды.
Жиында Алматы қаласы әкімінің орынбасары Абзал Нүкенұлы Мемлекет басшысының арнайы құттықтау хатын оқып, ақынның ел тарихы мен мәдениетіне қосқан зор үлесін ерекше атап өтті. Сонымен қатар, бірқатар белгілі тұлғалар да құттықтау сөз сөйлеп, ізгі тілектерін білдірді.
Ақын Бауыржан Жақып өз сөзінде Олжас Сүлейменовтің шығармашылық және азаматтық болмысын жоғары бағалады:
-«Ұлы ақын Олжас Сүлейменов 90 жасқа толып отыр. Бүгін руханиятты сүйетін қауым түгел жиналды. Оның ғұмыры – қазақ баласына үлгі. Жастайынан жарқ етіп танылып, Лондон, Париж, Нью-Йорк сынды әлемнің ірі қалаларында шығармашылық кештерін өткізді. Оның барлық еңбегі өз халқына, ұлтына арналды. Әсіресе Алаш қайраткерлерін ақтауға, Желтоқсан оқиғасына қатысқан жастардың ақталуына қосқан үлесі – ерекше», – деді ол.
Кеш тек құттықтау сөздермен шектелмей, мазмұнды концерттік бағдарламаға ұласты. Сахна төрінде қазақ өнерінің майталмандары мен жас орындаушылар өнер көрсетіп, көрерменге рухани әсер сыйлады. Ән мен күй әуелеп, ұлттық музыка мен заманауи композициялар үйлесім тапты. Салтанатты кеш соңында көрермендер Олжас Сүлейменовтің қазақ әдебиеті мен әлемдік мәдениеттегі орнын ерекше атау үстінде болды. Бұл мерейтойлық кеш ұлт руханиятының биік белесі ретінде есте қалды.
Аяжан Қуанышева