Ауыл тұрғыны итінің мінез-құлқы өзгеріп, агрессивті бола бастағанын байқап, ветеринарларға жүгінген, – деп хабарлайды aqshamnews.kz тілшісі "Жетінші" арнаға сілтеме жасап.
Солтүстік Қазақстан облысы Есіл ауданына қарасты Амангелді ауылында құтыру дерегі тіркелді.
Оқиға орнына келген мамандар талдау үшін сынама алып, зерттеу жүргізген. Сараптама нәтижесі жануардың құтыру жұқтырғанын растады. Алайда инфекцияның нақты қайдан жұққаны әзірге белгісіз. Мамандар ауру жабайы жануарлардан тарауы мүмкін деп болжап отыр.
Қауіптің алдын алу мақсатында елді мекенде карантиндік шектеулер енгізілді. Атап айтқанда, жануарларды сатуға және ауыл аумағынан шығаруға уақытша тыйым салынды. Жыл басынан бері өңірде ит қапқан 200-ден астам адам тіркелген.
Ветеринария басқармасының мәліметінше, шектеу шаралары енгізілгеннен кейін дезинфекция және жануарларды вакцинациялау жұмыстары басталған.
"Қазірдің өзінде 45 жануарға екпе салынған. Оның ішінде 36 ірі қара, бір ит және сегіз мысық бар", – деді ветеринария басқармасы.