Ұзынкөл ауданының бірқатар мектептерінде қатты аяз бен желге байланысты бірінші ауысымның оқу тәртібі өзгерді, деп хабарлайды Аqshamnews.kz тілшісі.
Аудандық білім бөлімі таратқан мәліметке сәйкес, Ұзынкөл ауылының №1 мектебінің, К. Дөненбаев атындағы мектептің және Троебрат орта мектебінің мектепке дейінгі даярлық сыныптары мен 1–4-сынып оқушылары бүгін қашықтан оқыту форматына ауыстырылды. Қалған сыныптар мен басқа білім беру ұйымдары қалыпты режимде жұмыс істеп жатыр.
«Қазгидромет» дерегінше, сейсенбіге қараған түні Қостанай облысының солтүстігі, шығысы және оңтүстігінде қар, боран, кей жерлерде көктайғақ пен тұман күтілген. Солтүстік-шығыс бағыттағы желдің жылдамдығы секундына 9–14, кей аумақтарда 15–20 метрге дейін жетуі мүмкін. Ауа температурасы түнде және күндіз –18…–23° аяз, солтүстігінде –26°, оңтүстігінде –13° аяз шамасында болады.
Қостанай қаласында да ауыспалы бұлтты күн, солтүстік-шығыс желі 9–14 м/с, ауа температурасы тәулік бойы –18…–20° аяз деңгейінде сақталады.