Алматы қаласы Білім басқармасының Қалалық білім берудегі жаңа технологиялардың ғылыми-әдістемелік орталығы (ҚБЖТҒӘО) шет елдегі тағылымдамалар арқылы педагогтердің кәсіби деңгейін арттыруға айрықша мән беріп келеді. Аталған орталықтың директоры Дәурен Сағынғалиев мұғалімдердің Сингапур еліндегі тағылымдамасының қорытындысымен бөлісіп, халықаралық ынтымақтастықтың отандық білім беру жүйесіне ықпалын атап өтті.
Алматы қаласын дамытудың 2025 жылға дейінгі бағдарламасы және 2030 жылға дейінгі орта мерзімді перспективасын іске асыру жөніндегі Жол картасына сәйкес, 2024 жылдың қыркүйек айында қала мектептерінің 63 информатика пәні мұғалімі Сингапурде тағылымдамадан өтті. Бұл іссапардың мақсаты – педагогтердің кәсіби құзыреттілігін арттыру, робототехника, бағдарламалау, жасанды интеллект пен заманауи ақпараттық-коммуникациялық технологияларды оқыту әдістемелерін меңгеру және оларды Алматы қаласының білім беру жүйесіне бейімдеу.
Тағылымдама аясында педагогтер халықаралық білім беру жүйесінің ерекшеліктерімен танысып, оқытудың инновациялық тәсілдерін, ІТ құралдармен тиімді жұмыс істеу дағдыларын жетілдірді. Оқу бағдарламасы цифрлық сауаттылықты арттыруға, жеке білім траекторияларын қалыптастыруға, ІТ жобаларды ұйымдастыру және командада жұмыс істеу қабілетін дамытуға бағытталды. Сонымен қатар, мұғалімдер ІТ саласындағы этика мен жауапкершілік, үздіксіз кәсіби даму ұғымдарын терең меңгерді.
Тағылымдама аяқталғаннан кейін ҚБЖТҒӘО қаланың 216 мектебінде Сингапур тәжірибесін тарату мақсатында ауқымды семинарлар ұйымдастырды. Бұл шараларға 1000-нан астам информатика пәні мұғалімі қатысты. Семинарлар барысында қатысушыларға АКТ мен жасанды интеллектті білім беру процесіне тиімді енгізу, оқушылардың сыни ойлауын дамыту, практикалық дағдыларын қалыптастыру жолдары ұсынылды. Сонымен қатар Python бағдарламалау тілі бойынша шеберлік сабақтар өткізіліп, нақты мысалдар мен кейстер негізінде тәжірибе алмасу жүзеге асты.
Бұған қоса, 2023 жылдың қазан айында ҚБЖТҒӘО-ның оқу жұмысы жөніндегі бөлімінің әдіскерлері физика, химия, биология және география пәндерінің 2500-ден астам мұғаліміне арналған оқыту семинарларын ұйымдастырды. Семинарлар Сингапурде тағылымдамадан өткен педагог-тренерлердің жетекшілігімен өтті. Онда зерттеуге негізделген оқыту, пәндік-ғылыми сауаттылықты дамыту, оқушылардың зертханалық жұмыстарын тиімді ұйымдастыру, заманауи оқу құралдары мен цифрлық ресурстарды қолдану жолдары қарастырылды.
Сауалнама нәтижелеріне сүйенсек, семинарларға қатысқан мұғалімдердің 83%-ы оқу үдерісінен жоғары қанағаттанушылық білдіріп, семинарларды өз жұмыс тәжірибесінде қолдануға дайын екендерін жеткізген.
Қалалық әдістемелік орталықтың директоры Дәурен Сағынғалиевтің айтуынша, бұл тәжірибелер алматылық мұғалімдердің кәсіби дамуына серпін беріп қана қоймай, қала мектептерінде білім сапасын арттыруға бағытталған нақты әрі нәтижелі қадам болды. Орталық алдағы уақытта да халықаралық тағылымдамалар мен заманауи педагогикалық тәжірибелерді жергілікті жүйеге ендіру жұмыстарын жалғастырмақ.
