Мәдениет және ақпарат министрі Орталық Азияның ортақ телеарнасын ашу мәселесі қаралып жатқанын айтты.
Телеарнаға бірлесіп контент дайындау бойынша нақты шешімдер қабылданды, деп хабарлайды aqshamnews.kz
Бүгін Астанадағы II Орталық Азия медиафорумында Қазақстан, Өзбекстан, Қырғызстан, Тәжікстан мен Әзербайжан өкілдері кездесіп, бірлескен медиа жобаларды шығару мәселесін талқылады.
Аида Балаеваның айтуынша, арнайы кездесуде нақты шешімдер қабылданды.
"Біз Silk Way телеарнасының жұмысына кірісіп, бірлесіп контент дайындау бойынша нақты шешімдерді қабылдадық. Осылайша, қазіргі кезде Орталық Азия елдері өңірдегі ақпараттық ынтымақтастықты нығайтуға бағытталған бірлескен телеарна мен өңірлік медиаплатформаны іске қосу мүмкіндігін қарастыру үстінде",-деді Балаева.
Министр медиа саласында өзара ынтымақтастықты нығайту мақсатында Қазақстанның бірнеше ұсынысын жариялады. Атап айтқанда,
Орталық Азияның журналистік академиясын құру,
өңірлік креативті хабын ашу,
журналистика саласында Орталық Азия сыйлығын тағайындау,
“Біздің адамдар” тележобасын іске қосу,
Наурызға арналған телекөпір ұйымдастыру,
сериалдар үшін төлемді азайту немесе мүлдем алып тастау,
тағы басқа бастамалар бар.