Маған біреу "тапсырыс" берген сияқты
Шымкенттің бұрынғы әкіміне құқық қорғау органдарынан ешқандай хабарлама келмеген, деп хабарлайды Almaty-akshamy.kz Оrda.kz-ке сілтеме жасап.
«Шынымды айтсам, ешқандай іс туралы хабарым жоқ. Ешкім ешқайда шақырған жоқ, маған ескертпеді. Әлеуметтік желіде жазылғандар бос сөз. Бұған менің еш қатысым жоқ. Бұл не үшін жасалғанын білмеймін. Ол адам (арыз жазған – авт.) – қарапайым кәсіпкер, Қазақстанда ондайлар көп. Мен көп кәсіпкерді білемін. Бірақ ол адаммен ешқандай қатысым болған емес. Онымен мүлдем байланыста болған жоқпын. Әрине, өмір бойы, дәлірек айтсақ, 22 жыл мемлекеттік қызметте болдым. Мен де басқалар сияқты бұл бизнесмендерді мемлекеттік қызметкер ретінде ғана білуім мүмкін», – деді Әбдірахымов.
Сондай-ақ, ол ауыр қылмыс жасады деп айыптау "өз алдына қылмыс екенін" атап өтті.
«Неге адамдар мұндайға жол береді. Бұл ақпаратты жариялаған Козачков мырза маған хабарласпады. Кеше Бас прокуратура да ақпаратты теріске шығарды. Бірақ олар әлі тынышталмай отыр. Маған біреу "тапсырыс" берген сияқты. Бірақ мұның не үшін жасалып жатқанын білмеймін», – деп қосты экс-әкім.
Әбдірахымов қазір Нұр-Сұлтанда тұратынын, кәсіпкерлікпен және жобалармен айналысып жатқанын айтты.
Айта кету керек, кеше полиция Шымкенттің экс-әкімі Ғабидолла Әбдірахымов пен ҚР ҰҚК бұрынғы төрағасы Кәрім Мәсімовке қатысты қылмыстық істің қозғалғанын растаған болатын. Хабарламада қылмыстық дерек бойынша іс жүргізуді Алматы қаласы ПД тергеу басқармасы жүзеге асыратыны айтылған.