Шымкент қаласында қызды өлтіріп және оның мүлкін ұрлағаны үшін кәмелетке толмаған жасөспірім 7 жыл 6 айға бас бостандығынан айырылды, деп хабарлайды Aqshamnews.kz тілшісі.
Баспасөз қызметінің, мәліметінше, қылмыстық іс Шымкенттің қылмыстық істер жөніндегі мамандандырылған ауданаралық сотында жабық түрде қаралған. Тергеу материалдарына сәйкес, шілде айында жасөспірім Telegram арқылы үй жинауға көмекші іздейтін хабарландыру жариялаған. Жәбірленуші сол күні келіп, тазалық жұмыстарын орындағаннан кейін келісілген төлемін талап еткен. Ақша төлеуден бас тартқан айыпталушы қызды өлтіріп, оның мобильді телефонын алып кеткен.
Сот жасөспірімнің кінәсін Қылмыстық кодекстің 99-бабы (кісі өлтіру) және 188-бабы (ұрлық) бойынша толық дәлелденген деп таныды. Ал 314-бап (мәйітті қорлау) бойынша айыбы дәлелденбегендіктен, ол бұл баптан ақталды.
Жаза тағайындау кезінде сот оның кәмелетке толмағанын және істеген ісіне өкініш білдіргенін ескеріп, жеңілдететін мән-жай ретінде қарастырды. Ауырлататын жағдайлар анықталмаған.
Айыпталушы жазасын кәмелетке толмағандарға арналған орта қауіпсіздік деңгейіндегі УИС мекемесінде өтейтін болады. Үкім әлі заңды күшіне енген жоқ.