Осы сенбі, 19 шілде күні тау шаңғы курорты "Шымбұлақ" Алматы тұрғындары мен қонақтарын ECO DAY — тұрақты даму жолындағы үлкен шаралар легінің бастамасы болатын экологиялық бастамалар күніне шақырады.
Іс-шараның басты мақсаты тауды қоқыстан тазарту ғана емес, әрбір азаматтың табиғатты қорғауға қалай үлес қоса алатынын көрсету.
Таңғы жалпықалалық сенбіліктен кейін "Шымбұлақ" базалық станциясынан қаза тапқан альпинистер мемориалына дейін қатысушыларды мазмұнды бағдарлама күтеді: жергілікті брендтердің экологиялық өнімдер жәрмеңкесі, пластикті сұрыптау мен қайта өңдеу бойынша түрлі шеберлік сағаттары ұйымдастырылады.
Атап айтқанда, Recycle Birge ұйымы қалдықтарды дұрыс сұрыптау және қандай қалдықтарды іс жүзінде қайта өңдеуге болатынын үйретеді, ал HelloEco бір реттік заттарды күнделікті өмірде көп реттік баламаларға қалай ауыстыруға болатыны жөнінде тәжірибесін бөліседі. Жәрмеңкеде "нөл қалдық" қағидатына негізделген дүкен өнімдері, қайта өңделген шыныдан жасалған бұйымдар, Іле Алатауының өсімдіктерінен жасалған ботаникалық паннолар, отандық экологиялық тұрмыстық өнімдер және өзге де тауарлар ұсынылады.
"EcoDay аясында біз тек қайта өңдеу мен саналы тұтыну туралы айтып қана қоймаймыз, оны өз қолымызбен қалай жүзеге асыруға болатынын іс жүзінде көрсетеміз. Қатысушылар белсенді атсалысып, сұрақ қойып, ой бөліседі. Дәл осындай қадамдар адамдарды тұрақты өмір салтына жетелейді", — дейді Recycle Birge қозғалысының тең құрылтайшысы Пәкизат Сайлаубекова.
Сол күні жиналған пластик пен өзге де қайта өңделетін қалдықтар Recycle Birge ұйымына жөнелтіледі. Ал қыста сол қалдықтан жасалған тау шаңғысы мен сноубордқа арналған тіреуіштер жұрт назарына ұсынылып, тұйық циклдің нақты үлгісі көрсетіледі.
Игі бастаманың серіктестері: Іле-Алатау ұлттық табиғи паркі, "Медеу" өңірлік табиғи паркі КММ, Алматы альпинизм федерациясы, WildNature Volunteers еріктілері, Recycle Birge және HelloEco экологиялық қауымдастықтары. Іс-шара Алматы қаласы әкімдігі жанындағы жобалық кеңсенің қолдауымен өтеді.
Қатысушыларды жинау "Медеу" базалық станциясында сағат 8:30-да басталады.
Қосымша ақпарат: Назерке Рзашова, PR-менеджер — +7 706 420 9516