Алматы облысында Lay’s қытырлақтарын шығаратын PepsiCo компаниясы зауытының құрылысында істейтін жұмысшылардың бірі зауыт басшылығының заңсыз әрекетін жайып салды, деп хабарлайды aqshamnews.kz
Жұмысшының айтуынша, «Нак» Нұр Астана Құрылыс компаниясы» құрылыс қалдықтарын жоймай, жерді қазып көміп тастап жатыр.
Автор видео жариялап, өзінің осы әрекетті көрсеткені үшін жұмыстан қуылатынын да айтты. Бейнежазбада КамАЗ көлігі әртүрлі ерімейтін, шірімейтін қоқысты тиеп әкеліп, қазылған шұңқырға төгіп жатыр, содан кейін ол жер тегістеліп, ештеңе болмағандай бәз баяғы қалпына келтіріледі.
«Зауыттан шыққан қоқыс. Пакеттер. Шіріп жерге сіңіп кететін де нәрсе емес. Осы шұңқырға әкеп төгеді, сосын бетін тегістеп жауып тастайды. «НАК» Нұр Астана Құрылыс» салып жатқан, «прораб» Ержігіт деген адам жасатып жатыр. Өзі жамағатқа сыйлы, жұмаға барып жүрген адам. Ынтымақ ауылындағы жағдай, қазіргі Алатау қаласы. Мені осы үшін жұмыстан шығарып жібереді, кепілдік берем, бірақ айтпасқа болмады, жүрекке тыныштық жоқ. Өзің жеріңді өзің ластағанға кінәлі сезінесің, шара қолдансаңыздар»,- деді жұмысшы.
Lay’s қытырлақтарын шығаратын зауытың құрылысы 2024 жылы басталған, биылғы наурызда іске қосу жоспарланған.