7 мамыр – шекара қызметінің сапына алынған жас шекарашылар үшін мәңгі есте қалатын күн. Себебі, дәл бүгін, Отан қорғаушылар күні Алматы қаласындағы ҚР Ұлттық қауіпсіздік комитеті Шекара қызметінің Техниканы және қару-жарақты жөндеу басқармасында 100 сарбаз Отанына адал қызмет етуге салтанатты түрде ант берді, – деп хабарлайды aqshamnews.kz тілшісі.
Аталған рәсімге Жетісу ауданының әкімі Ләззат Жылқыбаева, басқарманың басшылық құрамы, Шекара қызметінің ардагерлері, ант қабылдаған сарбаздардың ата-аналары мен туыстары қатысты.
Отан алдындағы борышын ел шебінде өтеуді таңдаған Фархат Берікұлы ант қабылдағаннан кейінгі әсерін бөлісті.
«Биыл сәуір айында Ақтөбе облысынан осы басқармаға шақыртылдым. Бүгін біз үшін ерекше күн, аздап толқып тұрмын. Өйткені, әскери ант – екі-ақ сөзден тұрса да, мәні терең ұғым. Оның үстіне, дәл Отан қорғаушылар күні Отан алдында ант бергеніме өте қуаныштымын. Антты әр адам үлкен жауапкершілікпен қабылдауы керек. Өзімнің бөлімшем жайлы айта кетсем, бізде тәртіп пен жауапкершілік әрдайым бірінші орында тұрады», – деді шекарашы.
«Застава тарландары» республикалық қоғамдық бірлестігі ардагерлер кеңесінің мүшесі, отставкадағы полковник Ерлан Серкебаев та жас сарбаздарға қолдау білдіру үшін арнайы келген.
«Әскери ант – ер азаматтың өміріндегі ең маңызды әрі жауапты сәттердің бірі. Антты адам өмірінде бір-ақ рет қабылдайды. Ол – ұзақ жыл архивте сақталатын тарихи құжат. Біз 40 жылға жуық әскери қызметте болдық, егемендік алғаннан кейін Қазақстан Қарулы күштерінің құрылуына үлесімізді қостық. Жас сарбаздарымыз антына берік болып, елге адал қызмет етеді деп сенемін. Отан қорғау жолында аман-есен қызметтерін атқарып, туған жерлеріне абыроймен оралсын», – деп батасын берді ардагер.
Жас шекарашылардың ант қабылдау рәсіміне еліміздің әр түкпірінен арнайы келген ата-аналар да қобалжып жүр. Олар үшін баласының әскери борышын абыроймен өтегені маңызды.
Баласының ант бергеніне куә болған Жамбыл облысы Жуалы ауданынан келген Сейтжаппар Бүйенбаев бұл күні әрбір ата-ана үшін толықынысқа толы екенін айтты.
«Әскери бөлімдегі сержанттық және офицерлік құрамға құрметім шексіз. Ал ата-аналарға айтарым, балаларымызды балабақшаға әкеліп отырған жоқпыз. Олар енді өзіне жауап бере алатын, Отан алдындағы жауапкершілікті сезінетін жаста. Бүгін әскери ант қабылдау арқылы елге адал қызмет етуге серт беріп отыр. Ең бастысы – абырой», – деді ата-ана.
Гүлжанат Сембаева