Air Astana Алматы – Шанхай – Алматы бағытында жаңа тұрақты рейс ашады, - деп хабарлайды Aqshamnews.kz.
Билеттер сатылымға шығарылды, ал алғашқы рейстерді іске қосу 2026 жылғы 29 наурызға жоспарланған (мемлекеттік органдардан қажетті рұқсаттар алынған жағдайда).
Алматыдан ұшулар сейсенбі, бейсенбі және жексенбі күндері орындалады. Ұшып кету уақыты – 19:10, Шанхайға келу – 04:25 (келесі күн). Қайтар рейстер дүйсенбі, сәрсенбі және жұма күндері жүзеге асырылады: Шанхайдан ұшу – 05:40, Алматыға келу – 10:15.
Рейстер заманауи әрі жайлы Airbus A321LR әуе кемесімен орындалады. Ұшу ұзақтығы Алматыдан Шанхайға 6 сағат 15 минут, кері бағытта 7 сағат 35 минутты құрайды.
Барлық алымдарды қоса есептегенде, эконом-кластағы барып-қайту билеттерінің ең төменгі құны 281 312 теңгеден, ал бизнес-класста 921 132 теңгеден басталады. Билеттерді Air Astana-ның ресми сайтынан, мобильді қосымшасынан және аккредиттелген туристік агенттіктерден сатып алуға болады.
Жаңа бағыттың ашылуы Air Astana-ның Қытайдағы маршруттық желісін кеңейтеді. Бұған дейін әуе компаниясы Бейжің, Гуанчжоу, Үрімші және Санья қалаларына рейстер орындап келген. Алматы – Шанхай бағыты Қазақстан мен Азияның ірі іскерлік орталықтарының бірі арасындағы туристік және іскерлік сапарларға қосымша мүмкіндік береді.
Шанхай – Қытайдың қаржы және іскерлік астанасы саналатын мегаполис. Қала заманауи сәулетімен, бай тарихымен және мәдени әртүрлілігімен танымал. Негізгі көрікті орындарының қатарында Вайтань жағалауы, «Шығыс маржаны» телемұнарасы, Юйюань бағы, сондай-ақ музейлер, театрлар мен ірі сауда кварталдары бар. Сонымен қатар қазақстандықтар үшін Қытайға визасыз кіру мүмкіндігі қарастырылған.