Радиоэлектроника және байланыс әскери-инженерлік институтында әскери қызметшілердің балалары арасында шахматтан турнир өтті.
Ұйымдастырушылар жарысты тәуелсіз Қазақстанның тұңғыш Қорғаныс министрі армия генералы Сағадат Нұрмағамбетовтің мерейтойына орайластырды. Оған 8-12 жас аралығындағы 15 шахматшы қатысты, деп хабарлайды аlmaty-akshamy.kz.
Жас спортшыларды институт бастығының тәрбие және идеологиялық жұмыстар жөніндегі орынбасары подполковник Медғат Мадрахимов құттықтады. Ол әскери қызметшілердің отбасы мүшелерімен жұмыс жөніндегі қызметтің арқасында әскери институтта шахмат турнирін өткізу жақсы дәстүрге айналғанын атап өтті. Сондай-ақ, келесі жылы интеллектуалды сайыстың ауқымы кеңейетініне сенім білдірді. Турнир "блиц" форматында өтті. Соған сәйкес, әр ойыншыға шектеулі уақыт берілді. Шахматтың бұл түрі спортшыдан жылдам әрекет ету мен жақсы дайындықты талап етеді. Шахмат турнирінің қорытындысы бойынша бірінші орынды 8 жастағы Марат Рахымжан жеңіп алды. Екінші орынға Ален Ардақұлы, үшінші орынға Жасұлан Ержан табан тіреді.
- Ойын қызықты, ал қарсыластар мықты болды. Бірақ мен жеңіске жетуді мақсат еттім. Ұйымдастырушыларға турнирге қатысуға мүмкіндік бергені үшін алғыс айтамын, – деді турнир жеңімпазы Марат Рахымжан.
Жарыстың жеңімпаздары мен жүлдегерлері грамоталармен және бағалы сыйлықтармен марапатталды.