Өткен аптаның жексенбісінде ҰҚК Шекара қызметінің Алматы облысы бойынша департаментіне қарасты Райымбек ауданы шекара басқармасында өткен салтанатты рәсім «Күз-2024» шақырылымы сарбаздарының ата-аналарымен сұхбаттасудан басталды.
Қатардағы жауынгер Нұржан Суровтың ата-анасы Исқар ағамыз бен Эльмира апай бүгінгі шараға арнайы қатысу үшін Жамбыл облысы, Қордай ауданының Қызылсай ауылынан келіпті. Олар бізбен жылы амандасып, сұхбат беруге ықылас танытты. Суровтардан білгеніміздей, ұлдары Нұржан әскери қызметке өз еркімен сұраныпты.
— Ата-ананың көңілі балада ғой... Ұлымызды көріп, мауқымызды басу үшін сағынып жеттік. Көзіміздің қарашығы бүгін ант қабылдайын деп жатыр. Бұл да ұлымыздың ер-азамат атанғанының белгісі. Біз үшін осы қуанышын көруден асқан бақыт бар ма? – деді толқыған Исқар Суров.
Осы кезде олардың ту сыртында, алаң бойында сап түзеген 500-ге жуық жас сарбаздың бірі, қатардағы жауынгер Н.Суров та толқып тұр еді.
Салтанатты рәсімді ашқан департамент бастығы полковник Әлібек Каюповтың бұйрығымен алаңға Жауынгерлік Ту жеткізілгеннен кейін «Күз-2024» шақырылымының сарбаздары ант қабылдай бастады. Сарбаздардың «Мен, қатардағы жауынгер ...» деп басталатын дауыстарынан олардың шекараны қорғауға, туған елінің тыныштығы үшін барлық қиындықтарға дайын екендіктері сезіліп тұрды.
Салтанатты рәсімнің негізгі бөлімі басталып, департамент бастығы полковник Ә.Каюпов пен Ұйғыр ауданының әкімі Б.Елеусізова сөз сөйлеп, сарбаздарды ант қабылдауларымен құттықтады. Сарбаздар атынан сөйлеген қатардағы жауынгер Дияс Тілектес те сенімді ақтап, ел шебін күзетуге уәде берді.
Рәсім барысында департамент бастығы полковник Ә.Каюпов «Срочник 2.0» бағдарламасының грантын жеңіп алған «Күз-2023» шақырылымының сарбаздары Расул Артықжанов пен Еділ Тілеубекке сертификаттар табыстап, Отан алдындағы қызметтері үшін алғыс білдірді.
Шара шекара басқармасының арнаулы мақсаттағы ұтқыр іс-қимылдар тобының көрініс көрсетуімен жалғасты. Шекарашылар шекара бұзушыларды ұстау әдіс-тәсілдерін көрсетіп, жауынгерлік даярлықтарының жоғары деңгейде екенін дәлелдеді.
«Мен қазақпын» әні. Әуелде Қарулы Күштердің әскери шеруінде орындалған бұл ән бүгінгі күні шекарашы сарбаздардың әнұранына айналғандай. Әнді 500 сарбазбен бірге алаң шетіне жиналған халық та орындады. Әннің құдіреті деген осы шығар, бәлкім.
Салтанатты рәсімнен кейін ата-аналар ұлдарымен қауышып, мәз-мейрам болған.
Иә, халқыңа, оның заңды сайланған Президентіне, өзіңе серт беру – тамыры тереңде жатқан жауынгерлік дәстүр. Осынау айрықша сәтті бастан өткерген сарбаздар сенімге селкеу түсірмейтініне сенім мол.