Алатау ауданында “Таза Қазақстан” бағдарламасының «Алматы – біздің ортақ үйіміз» науқаны аясында мәдениет қайраткерлері мен қала тұрғындары тазалық жұмыстарына атсалысты.
Сенбілік Момышұлы мен Мөңке би көшелерінің қиылысындағы саябақта өткізілді. Алатау ауданы әкімдігі Көріктендіру бөлімінің бас маманы Мадияр Абуев іс-шара аясында орындықтар сырланып, саябақ және футбол алаңының аумағы қоқыстан тазаланғанын атап өтті.
- «Алматы – біздің ортақ үйіміз» науқаны өз жалғасын тауып жатыр. Бүгінгі іс-шараға Мәдениет басқармасының, Спорт басқармасының және Алатау ауданы әкімдігінің қызметкерлері, сондай-ақ 3 мердігер мекеме жұмысшылары көмегін беруде. Жалпы тазалық жұмыстарынан бөлек жолға шығып тұрған ағаштардың бұтақтарын кесу жұмыстары да жүргізілуде, - деді ол.
Ал ҚР Еңбек сіңірген қайраткері Қарагөз Сүлейменова қала тұрғындары арасында тазалық мәдениетін қалыптастырудың маңыздылығына тоқталды.
- “Таза Қазақстан” науқаны екі жылдай өтіп жатыр. Бұл өте маңызды мәселе. Біз тұрған жерімізге, өтіп жүрген жолымызға жанашырлықпен қарамасақ, Алматыдай керемет қаламыз қалай гүлдейді. Осындай бастамалар арқылы біз өсімізді ғана емес, балаларымызды да тәрбиелейміз. Біздің ішкі мәдениетіміз биік болуы керек, - деді Қарагөз Сүлейменова.
Тазалық жұмыстарына атсалысқан Алатау дәстүрлі өнер театрының әртісі Аяулым Құнанбай қаланың тазалығы әр азаматтың парызы екенін айтты.
- Алатау дәстүрлі өнер театрының ұжымы болып Мөңке би көшесіндегі саябаққа келіп қалдық. Осындай іс-шаралар арқылы біз қаламыздың таза болуына үлес қосамыз. Жүрген жерімізді таза ұстау, оны ластамау - әрбіріміздің парызымыз деп ойлаймын, - деді Аяулым Құнанбай.