Алматы қаласының Бас жоспарын іске асыру мақсатында және Алматы қаласы әкімдігінің 2013 жылғы 9 сәуірдегі №2/259 қаулысына сәйкес, 2025 жылдың шілде айында Сейфуллин көшесі мен Жансүгіров көшесінің қиылысындағы көлік жолайрығының құрылысы аяқталды, – деп хабарлайды aqshamnews.kz тілшісі.
2025-249 тапсырма, 5-тармақ:
Сейфуллин – Жансүгіров көшелері қиылысындағы сквер маңына қоғамдық көлікке арналған аялдама кешенін орнату мәселесін қарастыру.
Орындалды.
2025-93 тапсырма, 8-тармақ:
Сейфуллин даңғылы – Жансүгіров көшесі және Саин көшесі – Мөңке би көшесі бағыттарындағы көлік жолайрықтарының құрылысын белгіленген мерзімде аяқтап, абаттандыру жұмыстарын толық орындау және әкімнің жұмыс сапары барысында айтылған ескертулерді жою (аралық есеп – 2025 жылғы 30 шілде).
Орындалды.
Жобаның негізгі мақсаты – қаладағы маңызды көлік тораптарының бірінде жол өткізу қабілетін арттыру және жол қозғалысының қауіпсіздігін қамтамасыз ету. Бұл үшін көше қиылыстарындағы көлік жүктемесін азайту, көлік ағынын тиімді ұйымдастыру, жол жүру уақытын қысқарту, кептелістер мен жол-көлік оқиғаларын төмендету, сондай-ақ жол желісінің тұрақты әрі тиімді жұмысын қамтамасыз ету көзделді.
Жоба аясында заманауи көпдеңгейлі көлік жолайрығы салынды. Оның құрамына эстакадалар, жол өткелдері және негізгі бағыттар бойынша көліктің үздіксіз қозғалуын қамтамасыз ететін бұрылыстар енгізілді. Тұрғындардың қауіпсіздігі мен қолайлылығы үшін 2 жерүсті жаяу жүргіншілер өткелі салынды.
Сонымен қатар сыртқы жарықтандыру жүйелері, бағдаршамдар, жол белгілері және қоршаулар орнатылды. Нөсер суын ағызу жүйесі жасалып, инженерлік коммуникациялар көшіріліп, жаңғыртылды.
Іргелес аумақтарды кешенді дамыту мақсатында жолдар қайта жаңартылып, кеңейтілді, тротуарлар мен қоғамдық көлік аялдамалары жабдықталды, сондай-ақ абаттандыру және көгалдандыру жұмыстары жүргізілді.
Осы жобаның жүзеге асырылуы нәтижесінде көлік торабының өткізу қабілеті айтарлықтай артып, жол кептелістері азайды және жол қозғалысы қауіпсіздігінің деңгейі жоғарылады.