Бүгін – Қаныш Сәтбаевтың туған күні және Қазақстандағы Ғылым қызметкерлерінің кәсіби мерекесі. Айтулы датаға орай ҚР Президенті жанындағы Ұлттық ғылым академиясының бастамасымен Ғылым академиясы ауласында «Сәтбаев сакурасы» қайта отырғызылды. Бұл туралы Aqshamnews.kz сайты хабарлайды.
Екінші дүниежүзілік соғыс кезінде Ғылым академиясының ғимаратын жапон тұтқындары салған. Сол кезде академия басшысы Қаныш Сәтбаев оларға қамқорлық көрсетіп, адамгершілік танытқан. Кейін елдеріне оралған жапондар алғыс ретінде сакура көшеттерін жіберіп, 1950-жылдары академия жанына үш сакура отырғызылған. Алайда 1990-жылдары екі сакура «құрылысқа кедергі келтіреді» деген себеппен кесілген еді.
Биыл сол әділетсіздік қалпына келтіріліп, Kanzan және Kiku-Shidare түріндегі сакуралар қайта егілді. Бұл – Сәтбаевқа деген құрметтің, ғылым мен адамгершілікке тағзымның белгісі.