Алматы қаласының сайлау комиссияларының кадрлары арнайы оқытудан өтіп жатыр
Қазақстан Республикасы Президентінің жанындағы Мемлекеттік басқару академиясының Алматы қаласы бойынша филиалында Алматы қаласының аумақтық және учаскелік сайлау комиссияларының мүшелері мен төрағалары үшін «Қазақстан Республикасындағы сайлау процесі: теория және практика» тақырыбында оқыту семинары өткізіліп жатыр.
Аталмыш семинардың басты мақсаты – сайлау заңнамасының негіздерін және оны Қазақстан Республикасының Президентіне сайлау кезінде қолдану практикасын білу есебінен кәсіби құзыреттер мен практикалық дағдылар деңгейін арттыру болып табылады.
Семинарда, оқыту бағдарламасына сәйкес, сайлау комиссияларының жұмысын ұйымдастыру, дауыс беру тәртібі және сайлауда дауыс беру қорытындысын шығару, сайлау заңнамасын бұзғаны үшін жауапкершілік, қоғамдық бақылаушылармен және БАҚ өкілдерімен өзара іс-қимыл туралы және т.б. практикалық және интерактивтік форматтағы сабақтар қарастырылып отыр.
Оқыту барысында дауыс беру күні сайлаушылармен жұмыста сайлау комиссиялары мүшелерінің мінез-құлқы, ықтимал жанжалды жағдайларды шешу мәселелеріне ерекше назар аударылады.
Сондай-ақ, семинарға қатысушылар арасында нақты практикаға бағдарланған «Қазақстан Республикасы Президентін сайлау күні» іскерлік ойыны өткізілді.
Сабақтарды филиал оқытушылары, сайлау заңнамасындағы сарапшылар және алдыңғы сайлауды өткізуде айтарлықтай тәжірибесі бар сайлау процестерін ұйымдастырушылар мен бизнес-тренерлер жүргізіп жатыр.
Аталмыш оқу бағдарламасы 2018 жылдан бастап ҚР Орталық сайлау комиссиясы мен Қазақстан Республикасы Президентінің жанындағы Мемлекеттік басқару академиясы арасында жасалған меморандум шеңберінде Алматы қаласының аумақтық сайлау комиссиясымен бірлесіп іске асырылып келеді.