Төтенше жағдай министрлігі аулаларда ретсіз қойылған көліктерге қатысты үндеу жасады, – деп хабарлайды aqshamnews.kz тілшісі.
Өртті сөндіруді қиындататын себептердің бірі — тұрғын үйлерге өрт сөндіру техникасының кіре алмауы. Бұл көбінесе көліктердің ретсіз тұраққа қойылуы салдарынан болады.
"Төтенше жағдайлар қызметі мен полиция қызметкерлері мәселені өз көздерімен көріп, оның алдын алу мақсатында профилактикалық рейдтер жүргізуде. Қазақстан Республикасы Өрт қауіпсіздігі қағидаларының 164-тармағына сәйкес: "Ғимараттарға, құрылыстарға, сыртқы сатыларға және өртке қарсы су көздеріне апаратын жолдар, кірме жолдар мен өтпе жолдар жарамды күйде ұсталып, өрт сөндіру техникасының еркін өтуіне қолжетімді болуы тиіс", - делінген хабарламада.
Төтенше жағдай кезінде кез келген кідіріс адам өміріне қауіп төндіруі мүмкін.
Айта кетейік, қайғылы оқиға 12 сәуірге қараған түні Астанадағы Түркістан көшесінде орналасқан 21 қабатты тұрғын үйдің 15-қабатындағы пәтерлердің бірінде болды.
Пәтерден үш баланың мәйіті табылды. Өртсөндірушілер бір әйелді құтқарып қалды, кейін ол ауруханаға жатқызылды. Жоғары қабаттардан 20 адам эвакуацияланды, тағы 40-қа жуық тұрғын ғимараттан өз бетінше шығып үлгерген.
Бұл дерек бойынша соталды тергеп-тексеру басталды, тиісті сараптамалар тағайындалды. Кейін көмектің кешігуіне ретсіз қойылған көлік аталып, оның иесі жазаланды.