24 және 25 шілдеде Жамбыл мен Алматы облыстарындағы республикалық маңызы бар автожолдарда екі ірі жол-көлік оқиғасы тіркелді, деп хабарлайды Aqshamnews.kz "ҚазАвтоЖол" ұлттық компаниясының мәліметіне сілтеме жасап.
24 шілдеде таңғы 09:40 шамасында Жамбыл облысы, Мойынқұм ауданындағы Қашқантеңіз станциясы маңында орналасқан "Астана – Қарағанды – Алматы" автожолының 451-шақырымында Toyota Alphard маркалы көлік жүк тиейтін экскаватор көлігімен соқтығысты. Алдын ала мәліметке сәйкес, жүргізуші жылдамдық пен арақашықтықты сақтамаған. Апат салдарынан төрт адам қаза тауып, тағы екі адам жарақат алған.
25 шілдеде сағат 10:15-те, Алматы облысы, Жамбыл ауданы, Самсы ауылы маңындағы KAZ-06 автожолының 81+500 шақырымында дәл осы маркадағы көлік трактормен соқтығысты. Жол жөндеу жұмыстары жүріп жатқан учаскеге заңсыз кіріп кеткен көлік жүргізушісі белгіленген жылдамдықты асырғаны және жол ережесін бұзғаны айтылды. Оқиға салдарынан алты адам көз жұмды. Оның бірі жол жұмысшысы болған. Тағы екі адам жарақат алған.
Еске салайық, 5 шілдеде Қарағанды облысы, Ақшатау кенті маңында да қайғылы жол апаты болған еді. Kia Sedona көлігінің жүргізушісі жол ережесін сақтамай, жөндеу жүріп жатқан аумаққа кіріп кетіп, қоршауға соғылған. Соның салдарынан көлік өртеніп, жеті адам оқиға орнында мерт болды.