Республика күніне орай еліміздегі бассейндік инспекцияларға 20 автокөлік табысталды, деп хабарлайды aqshamnews.kz
Астанада су шаруашылығы саласының қызметкерлерін мемлекеттік және ведомстволық наградалармен марапаттау рәсімі өтті. Салтанатты жиынға Қазақстан Республикасы Премьер-Министрінің орынбасары Қанат Бозымбаев пен Су ресурстары және ирригация министрі Нұржан Нұржігітов қатысты.
«Құрметті әріптестер, сіздерді шын жүректен Республика күнімен құттықтаймын. Бұл еліміздің тарихи таңдауын айқындаған Егемендік декларациясы қабылданған күн. Мемлекет басшысы Қасым-Жомарт Тоқаев қарапайым еңбек адамының мәртебесін көтеруге ерекше мән беріп келеді. Президент елімізде 2025 жылды жұмысшы мамандықтары жылы деп жариялады. Су шаруашылығы саласында еліміздің су қауіпсіздігін қамтамасыз етуде тынымсыз еңбек етіп жүрген он мыңнан астам адам бар. Әрқайсыңызға зор денсаулық, күш-жігер және толайым табыс тілеймін!» - деді Су ресурстары және ирригация министрі Нұржан Нұржігітов.
Мереке қарсаңында су шаруашылығы саласының 34 маманы мемлекеттік наградалармен марапатталды. Олардың ішінде 8 адам «Құрмет» орденімен, 2 қызметкер ІІІ дәрежелі «Еңбек даңқы» орденімен, 13 маман «Ерен еңбегі үшін» медалімен марапатталды. Сонымен қатар, «Су шаруашылығының ардагері» және «Су шаруашылығының үздігі» төсбелгілері, сондай-ақ, Су ресурстары және ирригация министрінің «Құрмет грамотасы» мен «Алғыс хаты» табысталды.
Салтанатты жиында сушылар династиясының өкілдері де марапатқа ие болды. Айта кету керек, «Қазсушар» кәсіпорнында 67 сушылар әулеті жұмыс істейді.