Ертең Республика күніне орай Алматы төрінде орналасқан Қазақ мемлекеттік циркінде елімізге белгілі цирк артисі Кәрім Мұтырғановтың бенефисі өтеді.
Мерейлі 70 жасқа толып отырған артист 50 жылын цирк өнеріне арнаған. Тәуелсіз Қазақстан даңқын әлемнің 30-дан астам мемлекетіне дәріптеген.
Кейінгі 10 жылда ол цирк аренасына шықпаған болатын. Сондықтан еліміздегі ең танымал цирк әулетінің негізін қалаушы, режиссер, ұстаз, «Мутурганчики» триосының продюсері Кәрім Мұтырғанов үшін ертең мерейлі күн. Ол өзі, ұлы және немересі қатысатын бенефистің жақсы өтетініне сенеді.
— Кәрім Мұтырғанов үшін Алматы циркі өзінің екінші үйі іспетті. Ол өнердегі жолын дәл осы ордада бастаған. Кәрім Мұтырғанов бенефисінде бүкіл әлем көрермендеріне ұнаған ең жақсы репризалары мен ерекше нөмірлерін көрсететін болады. Сондай-ақ шоуға еліміздің әр түрлі қалаларының артистері мен Ж.Елебеков атындағы Республикалық эстрада-цирк колледжінің студенттері қатысады. Ал бұл өз кезегінде жас мамандардың цирк биігінде жұлдыздай жарқырауына жол ашады деп білемін, — дейді Мұрат Мұтырғанов.
Осы орайда айта кетсек, Кәрім Мұтырғановтың ұлы Мұрат Мұтырғанов "Рекордтар кітабына" еніп, "Әлемдегі ең жас клоун" дәрежесін иеленген.
Біз бүгін ертеңгі бенефиске атсалысатын жас артистердің, студенттердің дайындығын тамашаладық. Олардың көзінен өнерге деген құрметті, жасқа тән жалынды көрдік. Кәрім Мұтырғанов ізбасарларына сәттілік тіледі.