Референдумда дауыс берген алғашқы қазақстандық - Токио қаласындағы жақында 18 жасқа толған жас сайлаушы Алижан Салиев.
Сыртқы істер министрлігінің мәліметінше, шетелде алғашқы болып Жапония мен Корея Республикасындағы дауыс беру учаскелері өз жұмысын бастады, - деп хабарлайды Almaty-akshamy.kz
Ведомство мәліметінше, Жапония мен Корея Республикасында тұратын Қазақстан Республикасының азаматтары еліміздің Конституциясына өзгерістер мен толықтырулар енгізу жөніндегі жалпыұлттық референдумда өздерінің дауыс беру конституциялық құқығын алғашқылардың бірі болып пайдаланды.
Токио қаласындағы №261 учаске жергілікті уақыт бойынша таңғы сағат 7-де (Нұр-Сұлтан уақыты бойынша сағат 4:00-де) Қазақстан Республикасының азаматтары үшін өз есігін ашты. Алғашқы минуттардан бастап қазақстандықтар өздерінің «Жаңа Қазақстанды» құруға қатысуға азаматтық құқықтарын іске асыру үшін айтарлықтай белсенділік танытып жатыр.
Референдумда дауыс берген алғашқы қазақстандық - Токио қаласындағы жақында 18 жасқа толған жас сайлаушы Алижан Салиев. Бұл оның алғашқы сайлауы.
«Мен жақында 18 жасқа толдым және осындай тарихи оқиғаға алғаш рет қатысу мен үшін өте қызықты. Оған қоса бұл үлкен жауапкершілік, өйткені менің дауысым да Конституцияны жаңартуда ескерілетін болады. Мен Қазақстанның Жапония сияқты дамыған елге айналғанын қалаймын», - деді Алижан.
Қазақстандықтар Токиоға Жапонияның әр түкпірінен, соның ішінде Хиросима, Осака және Киото сияқты алыс префектуралардан да дауыс беруге келіп жатыр.