Кеше, 28 қыркүйек Алматы әуежайы мен қонақүй маңында футбол жанкүйерлері "Реал Мадрид" ойыншыларын ыстық ықыласпен қарсы алған еді. Жанкүйерлердің ерекше қолдауына қатысты команда ойыншысы Федерико Вальверде пікір білдірді, деп хабарлайды Aqshamnews.kz.
Жартылай қорғаушы мұндай жайттың олар үшін қалыпты жағдай екенін жеткізді.
"Иә, бұл біз үшін қалыпты жағдай. Бізді қалай қарсы алғанын көріп, қатты қуандық. Бізден алыс елден қарсы алушылардың болғаны – үлкен қуаныш. Алыс мемлекетке барып, жанкүйерлерімізді көру – біз үшін мақтаныш. Оларға жеңіс сыйлауға тырысамыз, – деді Вальверде.
Сонымен қатар ойыншы алдағы матчқа да тоқталды:
"Біз кез келген ойында жеңіске табандылық танытамыз. Бұған дейінгі қателіктердің орнын толтырғымыз келеді. Сол себепті бұрынғы сценарийді қайталағымыз келмейді", – деді ол.
Айта кетейік, 30 қыркүйек күні Алматыдағы Орталық стадионда «Реал Мадрид» пен «Қайрат» арасындағы кездесу өтеді.
28 қыркүйек Алматыдағы "Реал" фанаттары сүйікті клубын әуежай мен қонақүйде атой салып қарсы алған еді.