Алматы іргесіндегі Есік қаласында әдеттегі спорттық әңгіменің шеңберінен шығып, ауқымды мәселені қамтыған кездесу өтті.
Жергілікті спорт мектебінде жас спортшылар бұл жолы жаттығу мен жеңістер туралы емес, байқатпай бойлап енетін бір қауіп – діни экстремизм туралы ой бөлісті, деп хабарлайды aqshamnews.kz.
Іс-шараны ұйымдастырған – Дін саласындағы мәселелерді зерттеу орталығы. Орталық өкілдерінің пікірінше, қазіргі уақытта тек денені шынықтырып қана қоймай, сананы да манипуляциядан қорғау қажет. Әсіресе жастар арасында – мақсатшыл, белсенді, және ең бастысы – сенгіш жандар үшін бұл өте өзекті.
Жас спортшылармен ашық сұхбат жүргізген – дінтанушы, ақпараттық-түсіндіру тобының мүшесі Әбдіхамитов Бақдәулет Халиуллаұлы. Сарапшының айтуынша, дінді жамылған кейбір топтар шын мәнінде жанды құтқаруды емес, ерік-жігерді бағындыруды көздейді. Бүгінде интернет – олардың басты құралына айналған: олар өздерін тәлімгер етіп көрсетіп, эмоция мен білімсіздікті пайдаланып, адамдарды өз торына түсіреді.
Кездесу барысында қатысушылар радикалды топтарға тартушыларды қалай тануға болатынын, күдікті діни форумдарда жазылғанның бәріне сене берудің қаншалықты қауіпті екенін және жеке еркіндік үшін күресте сыни ойлаудың маңызын білді.
Жас спортшылар ұйымдастырушыларға шынайы әрі пайдалы әңгіме үшін алғыстарын білдірді. Себебі қазіргі таңда радикалды идеологиялар кез келген вирустан да тез тарайды. Сондықтан ақпараттық сауаттылық — спорттағы қорғаныс құралындай маңызды.