Алматыда 30 жылдан бері пайдаланылып келе жатқан жылу желілерін жаңарту жұмыстарына байланысты Рабиға Сыздық көшесінің бір бөлігінде қозғалыс 2,5 айға шектеледі, – деп хабарлайды aqshamnews.kz тілшісі.
Алдағы жылыту маусымына дайындық аясында Алматының Әуезов ауданында 1991 жылы пайдалануға берілген ұзындығы шамамен 300 метр болатын жылу трассасын жаңарту жұмыстары жүргізіледі. Бұл туралы «Алматы жылу желілері» ЖШС өкілдері хабарлады.
Осыған байланысты Мамыр шағынауданындағы Рабиға Сыздық көшесінде автокөлік қозғалысына уақытша шектеулер енгізіледі:
2026 жылы 21 мамыр мен 31 шілде аралығында — Мамыр-2 шағынауданындағы №12 үйден бастап аула аумағы арқылы Мамыр-3 шағынауданындағы №25 үйге дейінгі аралықта;
2026 жылы 26 мамыр мен 31 шілде аралығында — Бауыржан Момышұлы көшесінен Мамыр-1 шағынауданындағы №12 үйге дейінгі учаскеде.
Аталған кезеңде көлік қозғалысы екі бағытта да шектеледі. Бұл жол астындағы құбыр желілерін қайта жаңғырту жұмыстарын қауіпсіз жүргізу мақсатында қолға алынған. Қала тұрғындары мен қонақтарынан уақытша қолайсыздыққа түсіністікпен қарауды сұраймыз.
Қайта жаңарту жұмыстары барысында тұтынушыларға ыстық су беру тоқтатылмайды.
Аталған жылу желісі 160 көпқабатты тұрғын үйді, 3 балабақшаны, 5 мектепті, 1 денсаулық сақтау мекемесін және 26 өзге де нысанды жылу және ыстық сумен қамтамасыз етеді.