Түркияда демалған екі қызылордалық мұғалімнің басы дауға қалды.
Олар қысқы каникул кезінде шетелге барып демалуды жөн көрген, деп хабарлайды Almaty-akshamy.kz Zhasalash.kz-ке cілтеме жасап.
Шетел асқан мұғалімдер өздерінің демалысын әлеуметтік желі арқылы көрсетіп отырған. Ең сорақысы, педагогтар шетелде жүріп, бірнеше мәрте трансвеститтер клубында көңіл көтерген. Ұстаздардың бұл әрекетін ата - аналар әлеуметтік желілер арқылы көріп, ұстаздардың мектептен кетуін талап еткен.
Бейәдеп қылық көрсеткен Қызылорда облысы Қармақшы ауданына қарасты №250 мектептің ағылшын тілі пәнінің мұғалімдері. Шет тілін меңгерген мамандар Қызыл теңіз жағасында тынығу үшін мектеп әкімшілігін ескертіп, ақысыз демалыс алуды ұйғарыпты. Алайда кейін ұстаздардың Түркиядағы трансвеститтер клубында демалған видеолары әлеуметтік желілерде тарап кетіп, ата - аналардың наразылығын тудырған. Қарамағындағы қызметкерлердің мұндай әрекетке барғандығы мектеп басшылығын да есеңгіретіп тастаған көрінеді.
"Екеуі де ағылшын тілі пәнінің мұғалімдері, жас мамандар. Біреуінің "магистр" атағы да бар. Ұстаздардың әрекетін педагогикалық кеңесте талқыладық, жиналысқа әдейілеп тек әйел мұғалімдерді қатыстыруды жөн көрдім. Жиналыстан кейін ұстаздар өз еріктерімен жұмыстан кету туралы арыздарын жазды. Ол кісілер тек ұстаз ғана емес, сонымен қатар әйел кісілер, бала тәрбиелеп отырған ана. Әріптестеріміздің мұндай әрекетке барғандары өте ұят болды", - деп мәлімдеді мектеп директоры Гүлжахан Нарбаева.