Ресей Федерациясынан Сарыағаш қаласына бет алған ондаған жолаушысы бар автобус Қызылорда облысының трассасында істен шығып, қалып қойды, - деп хабарлайды aqshamnews.kz тілшісі Төтенше жағдайлар министрлігінің баспасөз қызметіне сілтеме жасап.
Оқиғаның мән-жайы
Оқиға бүгін болды. Таңертең "112" пультіне Қызылорда облысының Арал ауданындағы трассада автобустың бұзылғаны туралы хабарлама түскен. Автобус "Қарабұтақ – Қызылорда – Шымкент" автожолының 73-ші шақырымында қалған. Көлікте 34 адам болған, олардың барлығы – шетел азаматтары.
Хабарлама түскен бойда оқиға орнына ТЖМ құтқарушылары жедел жіберілді.
Құтқарушылар барлық 34 адамды жылы жерге көшіріп, эвакуациялауды қамтамасыз етті. Жолаушылар Арал қаласына жақын орналасқан арнайы жылыту пунктіне жеткізілді.
Ведомство мәліметінше, жолаушылардың өміріне қауіп төнген жоқ, олар жылы және қауіпсіз жерде. Автобусты жөндеу немесе ауыстыру мәселесі шешіліп жатыр.