Threads әлеуметтік желісінде Астанадағы донер сататын орындардың бірінде қызметкер әріптесінің үстіне ыстық майды төгіп жіберген сәт түсірілген видео тарады. Бұл оқиға желіде қызу талқыланып жатыр, - деп жазады Aqshamnews.kz.
Не болды?
Видеодан қызметкер ыстық май құйылған ыдысты алып шыққаны көрінеді. Бір сәтте ол тепе-теңдігін жоғалтып, ыдыс төңкеріліп, май екінші қызметкердің үстіне құйылады.
Пост авторы оқиға салдары өте ауыр болғанын жазады. Оның айтуынша, компания зардап шеккен қызметкердің жарақаты үшін жауапкершілік алмаған.
"Оның бүкіл арқасы іріңдеп жатыр. Компания жауапкершілікті мойнына алғысы келмейді. Бұл - сұмдық. Мүмкін, тері ауыстыру операциясы қажет болатын шығар", – делінген жазбада.
Компания не дейді?
Желіде видео кең тарап кеткен соң, оқиғаға қатысты компания ресми пікір білдірді.
Мекеме мәлімдемесінде зардап шеккен қыздың еміне ақы төленбеді деген ақпарат шындыққа сәйкес келмейді деп көрсетілген.
"Оқиға расымен де шамамен бір ай бұрын біздің дәмханалардың бірінде болған. Бұл өте жағымсыз жағдай – қызметкердің үстіне абайсызда ыстық май төгілген. Біз бірден барлық қажетті көмекті көрсеттік, зардап шеккен қыздың ата-анасымен кездестік, ем-домына ақы төледік және өтемақы бердік", – делінген Instagram парақшасындағы мәлімдемеде.
Еңбек министрлігі мен полиция не дейді?
Tengri Life тілшілері бұл жағдайға байланысты Еңбек министрлігіне және Астана қалалық полиция департаментіне сұрау салған.
"Егер жұмыстағы жазатайым оқиғадан кейін зардап шеккен адам өзіне ем-дом шығындары немесе өтемақы төленуі керек деп санаса, бірақ жұмыс берушімен келісімге келе алмаған жағдайда, тұрғылықты мекенжайы бойынша еңбек инспекциясына жүгінуі қажет. Әрбір жағдай жеке қаралады", – деді Еңбек және халықты әлеуметтік қорғау министрлігінің баспасөз қызметі.