Екібастұзда полиция қызметкерлері тұрғын үйде ұйымдастырылған заңсыз алкоголь өндіру цехының жұмысын тоқтатты, деп хабарлайды Aqshamnews.kz тілшісі.
Тексеру барысында тәртіп сақшылары үй ішінен белгісіз сұйықтық құйылған 139 пластик бөтелкені, сыраға ұқсас 288 литр сұйықтықты, сондай-ақ 10 шыны колба мен спирт пен алкоголь өнімдерін қолдан жасап шығаратын арнайы құрылғыны тәркіледі.
Екібастұз қалалық полиция басқармасының бастығы Төлеген Құдайбергеновтің айтуынша, дайын өнімдерге белгілі брендтердің жапсырмалары жапсырылғанымен, акциздік маркалары болмаған.
Тәркіленген алкоголь сараптамаға жіберілді. Сараптама қорытындысы шыққаннан кейін іс бойынша тиісті процессуалдық шешім қабылданады.
Полиция заңсыз алкоголь өндіру, сондай-ақ оны жасауға арналған құрал-жабдықтарды сақтау заңға қайшы екенін еске салды. Мұндай әрекеттер үшін қолданыстағы заңнамаға сәйкес жауапкершілік қарастырылған.