Ұлытау облысында жұмысшы мамандықтарға сұраныс күрт артты. Әсіресе, құрылысшы, сантехник және аспаз сияқты техникалық бағыттағы кадрлардың тапшылығы сезілуде. Осыған байланысты биыл мемлекет тарапынан тегін білім алуға бөлінетін гранттар саны едәуір ұлғайып отыр.
Жаңа оқу жылына Ұлытау өңірінде жұмысшы мамандықтарға 2250 грант қарастырылған. Бұл – өткен жылмен салыстырғанда айтарлықтай жоғары көрсеткіш. Қазірдің өзінде өңірдегі техникалық және кәсіптік білім беру мекемелерінде талапкерлерден құжат қабылдау науқаны жүріп жатыр. Жас мамандар тек білім алып қана қоймай, нақты өндірістік тәжірибеден өтіп, жұмысқа орналасуға мүмкіндік алады.
Бүгінгі таңда өңірдегі 150-ден астам кәсіпорын мен колледждер арасында әріптестік жөнінде меморандум жасалды. Бұл құжаттар негізінде студенттер өндірістік тәжірибеден өтіп, кейін жұмысқа орналасу мүмкіндігіне ие болады. Бұл шара жастардың мамандықты игеру барысында нақты дағдыны меңгеріп, еңбек нарығына тез бейімделуін қамтамасыз етеді.
Ұлытау облысындағы техникалық және кәсіптік білім беру мекемелерінің материалдық-техникалық базасы да заман талабына сай жаңартылып келеді. Оқу орындарына қазіргі заманға лайықты оқу құралдары мен симуляциялық құрылғылар сатып алынуда. Бұл – білім беру сапасын арттырып қана қоймай, студенттердің тәжірибелік машықтарын жетілдіруге септігін тигізеді.