Қарағанды облысындағы Шұбаркөл көмір кен орнын игерумен айналысатын «Шұбаркөл Премиум» АҚ директорлар кеңесінің құрамы толықтай өзгерді. Бұл өзгеріс Тимур Құлыбаевтың компания құрылтайшыларынан шығуынан кейін болды, деп хабарлайды aqshamnews.kz.
KASE сайтында жарияланған құжатқа сәйкес, «Шұбаркөл Премиум» АҚ-ның бұрынғы төрайымы Луиза Ақанова және тағы төрт басқарушы кеңесті тастап кеткен. Олардың орнына компанияны басқаруға жаңа директорлар тағайындалды. Директорлар кеңесінің жаңа төрағасы Бауыржан Райымбеков, ал тәуелсіз директорлар ретінде Нұрлан Мәжен (ол бұрын Шығыс Қазақстан облысындағы Согринск ЖЭО-ның директоры болған), Дінмұхамед Мусралиев, Әблімит Рахматуллаев және Анет Шыныбаев қызметке кірісті.
Бір апта бұрын «Шұбаркөл Премиум» АҚ-ның иелері де ауысқаны белгілі болды. Тимур Құлыбаев өзіне тиесілі 67% үлесін екі белгілі бизнесмен – Кенес Рақышев пен Шухрат Ибрагимовқа сатқан болатын.
2024 жылдың 1 шілдесіне дейін «Шұбаркөл Премиум» АҚ-ның таза шығыны 6,3 миллиард теңгені құраған. Компанияның жалпы активтері 72,3 миллиард теңге деп есептелген.