Атырау облысы Құлсарыда 7 жасар қызды өлтірді деген күдікпен 36 жастағы ер адам ұсталды, - деп хабарлайды aqshamnews.kz тілшісі.
5 маусымда шамамен сағат 12:00-де Құлсарыда 2018 жылы туған қыз үйінен шығып кетіп, қайта оралмаған. Оның ата-анасы бірден полицияға жүгінген.
Жедел-іздестіру іс-шараларының нәтижесінде 6 маусымда түнгі сағат 02:19 шамасында баланың денесі Құрсай өзегінен табылды.
Баланы өлтірді деген күдікпен Құлсарының 36 жастағы тұрғыны жедел ұсталды. Ол уақытша ұстау изоляторына қамалып, сот санкциясымен қамауға алынды.
Бұл дерек бойынша қылмыстық іс қозғалды. Қазір оқиғаның барлық мән-жайын анықтау мақсатында тергеу жүргізіліп жатыр.
Полиция мұндай ауыр қылмыстар үшін заңда ең қатаң жаза қарастырылғанын ескертеді.
Қылмыстық істің тергелуі Атырау облыстық Полиция департаменті бастығының ерекше бақылауында.