Кеше Ұлттық тасымалдаушының пойыздарында жолаушылар үшін Оразаның алғашқы күні жайлы өтті.
Пойыз жолсеріктері жолаушыларды жылы қарсы алып, оларға құрма мен су бөтелкелерін таратты. Бұл акция «Жолаушылар тасымалы» АҚ барлық пойыздарында өткізілді, деп хабарлайды аlmaty-akshamy.kz.
Ұлттық тасымалдаушы Рамазан айында жолаушыларға бір-біріне түсіністікпен қарап, ашуланбауды, отырған орында тазалықты сақтауды, сондай-ақ, денсаулыққа мұқият қарауға кеңес береді. Ораза ұстаған жандарға саяхат кезінде әлсіздік сезінбеу үшін сапар алдында дәрігерге қаралу керектігін ескертеді.
Сонымен қатар, Рамазан айында пойыздардағы вагон-мейрамханалар арнайы жұмыс кестесіне ауысады.
Вагон-мейрамханалар күнделікті 8:00-ден 24:00-ге дейін жұмыс істейді. Ораза тұтқан жандарға ыңғайлы болу үшін мейрамханалар сәресі уақытында таңғы сағат 03:30-дан 05:00-ге дейін ашық болады.
Вагон-мейрамханаларда жолаушыларға су мен құрма тегін беріледі.
«Жолаушылар тасымалы» АҚ барлық мұсылмандарды қасиетті Рамазан айының басталуымен шын жүректен құттықтайды! Ұстаған Оразаларыңыз бен ниеттеріңіз қабыл болсын!
