Қостанай облысында ауа райының күрт нашарлауына байланысты республикалық маңызы бар автожолдың бір бөлігінде қозғалыс шектеліп, жолда қалған 44 жолаушы, оның ішінде 12 бала, қауіпсіз жерге эвакуацияланды, - деп хабарлайды aqshamnews.kz тілшісі.
Қарабалық ауданында қолайсыз ауа райына байланысты "Алматы – Екатеринбург" автожолының 318–539 шақырым аралығы, яғни Қарабалық кентінен Ресей Федерациясының шекарасына дейінгі бөлігінде жүк және қоғамдық көліктер үшін қозғалысқа уақытша шектеу енгізілді. Бұл шешім төтенше жағдайлардың алдын алу мақсатында қабылданған.
Енгізілген шектеулер салдарынан "Челябинск – Тәжікстан" бағытымен қатынап келе жатқан жолаушылар автобусының қозғалысы тоқтатылды. Құтқару қызметтері мен жергілікті атқарушы органдардың жедел әрекетінің нәтижесінде автобустағы 44 адам, оның ішінде 12 бала, жылыту пунктіне орналастырылды.
Жолаушыларға қажетті барлық жағдай жасалып, олар қауіпсіздік шараларымен қамтамасыз етілді. Адамдар ауа райы жақсарғанға дейін жылыту пунктінде болады.
Мамандар қолайсыз ауа райы кезінде алыс жолға шықпас бұрын автожолдардың жағдайын алдын ала нақтылауға, қозғалысқа шектеу енгізілген жағдайда сапарды кейінге қалдыруға кеңес береді. Сондай-ақ, жолға шыққан жағдайда өзіңізбен бірге жылы киім, қуатталған ұялы телефон және қажетті заттарды алып жүру ұсынылады.