Жетісу облысының прокуратурасы Инвесторлардың құқықтарын қорғау комитетінің үйлестіруімен, "Халықаралық шекара маңы ынтымақтастығы орталығы "Қорғас" басқарушы компаниясының қызметінде өрескел заң бұзушылықтарды анықтады, – деп хабарлайды aqshamnews.kz тілшісі.
Екі жыл бойы жалпы сомасы 70 млрд теңгеден асатын жобаларды жүзеге асырып жатқан 19 инвесторға су жеткізу тарифтерін есептеу кезінде қосылған құн салығы заңсыз түрде есептелген.
Алайда Салық кодексіне сәйкес, АЭА аумағындағы қызмет ҚҚС-тан босатылады. Соған қарамастан, заң талаптары жүйелі түрде ескерілмеген.
Нәтижесінде инвесторлар негізсіз қаржылық шығындарға ұшырап, бизнес үшін жасанды кедергілер қалыптасқан.
Прокурорлық қадағалау актісі негізінде барлық заңбұзушылық толық жойылды. Инвесторларға заңсыз өндірілген 1 млн теңге көлеміндегі қаражат қайтарылып, кінәлі тұлғалар жауапкершілікке тартылды.
Жетісу облысының прокуратурасы инвесторларға қысым көрсету мен олардың құқықтарын бұзудың кез келген әрекетінің жолы кесілетінін атап өтті.
Жетісу облысының прокуратурасы әкімшілік кедергілерге тап болған инвесторларды 8 (771) 131 04 44 телефоны немесе 115 Call-орталығы арқылы хабарласуға шақырады.
"Қорғастағы" 2 жылға созылған заңсыз есептеулер: прокуратура 19 инвесторды қорғап, бизнеске қаржысын қайтарды
