Қазақстанда кейінгі жылдары балаларға арналған әлеуметтік саясаттың бағыты едәуір өзгерді. Үкімет тарапынан қабылданған бірнеше маңызды бастама жас буынның болашағына салынған инвестиция ретінде бағаланады. Aqshamnews.kz тілшісі мұндай игі бастамаларға шолу жасады.
Ұлттық қор – балаларға
Былтырдан бастап "Ұлттық қор – балаларға" бағдарламасы іске қосылды. Бұл бастама аясында еліміздегі әр балаға жеке есепшот ашылып, жыл сайын Ұлттық қор табысының 50 пайызы осы шотқа аударылады. Қаражатты бала тек 18 жасқа толғанда және тек білім алу мен тұрғын үй сатып алуға пайдалана алады.
2025 жылы 6,9 миллионнан аса баланың атына алғашқы салымдар түсті. Бұл – мемлекеттің болашақ азаматқа ерте бастан қолдау көрсетуінің нақты мысалы.
2025 жылғы 1 мамырдағы жағдай бойынша, 97 615 өтініш орындалып, жалпы сомасы 11,49 миллион АҚШ долларынан аса қаражат уәкілетті операторлар арқылы өтініш берушілердің банктік шоттарына аударылған.
Оның ішінде Тұрғын үй жағдайын жақсартуға 6,70 миллион АҚШ доллары, яғни 56 937 өтініш; ал білім алу үшін 4,79 миллион АҚШ доллары, 40 678 өтініш орындалған.
"Жайлы мектеп" ұлттық жобасы
Қазіргі білім саласындағы басты мәселелердің бірі – үш ауысымды және апатты мектептер. Осыны шешу үшін 2023–2025 жылдарға арналған "Жайлы мектеп" ұлттық жобасы қабылданды.
Artsport: шығармашылық пен спортқа жол ашық
Баланың жан-жақты дамуына жағдай жасау үшін Artsport бағдарламасы іске қосылған. Бұл – әр балаға тегін спорт және шығармашылық үйірмелерге қатысу мүмкіндігін беретін ваучерлік жүйе.
2024 жылы Қазақстанда Artsport бағдарламасы аясында нақты қанша баланың үйірмелерге жазылғаны туралы ресми статистика әлі жарияланбаған. Ал 2023 жылы бұл бағдарлама бойынша 560 мыңнан астам бала мен жасөспірім қамтылғаны белгілі.
Денсаулық – басты назарда
Балалардың денсаулығын қорғау үшін жыл сайын скринингтік тексерулер, міндетті екпелер жүргізіледі. 2024 жылы еліміздің шалғай ауылдарына жылжымалы медициналық кешендермен дәрігерлер барып, 21 мыңнан аса балаға медициналық көмек көрсеткен.
Сондай-ақ, Қазақстанда алғаш рет "Феталдық медицинасы" жобасы іске қосылып, 20 жатырішілік операция сәтті жүргізілген. Бұл технологиялар ұрықтың ерте патологиялық жағдайларын аз инвазив емшаралар арқылы түзетуге және емдеуге арналған. Олар балалардың арасында мүгедектіктің алдын алу мақсатында ауыл тұрғындарына қолжетімді болады.
Әлеуметтік қолдау: жәрдемақы және мектепке керек-жарақ
Бір жолғы жәрдемақы көлемі қазір бірінші, екінші және үшінші балаға – 149 мың теңге, төртінші және одан көп балаға – 247 мың теңге. Көпбалалы және аз қамтылған отбасыларға мектеп формасы, құрал-жабдықтар "Мектепке жол" бағдарламасы арқылы жүзеге асады, сондай-ақ, ыстық тамақ, жазғы демалыс лагерьлері мен үйірмелер тегін ұсынылады.