Кездесу барысында оқу шарттары, жергілікті атқарушы органның гранттарын беру, сондай-ақ резидентурадан өтуге байланысты негізгі ұйымдастырушылық мәселелер талқыланды, – деп хабарлайды aqshamnews.kz тілшісі.
Алматы қаласы Қоғамдық денсаулық сақтау басқармасының басшысы Марат Пашимов сұранысқа ие медициналық мамандықтар бойынша резидентураға түскен 120 жас дәрігермен кездесті.
Резиденттер келесі бағыттар бойынша білім алады: психиатрия, анестезиология және реаниматология, онкология, кардиология, отоларингология, неонатология, клиникалық фармакология, терапия, жұқпалы аурулар, эндокринология, фтизиатрия, неврология, жалпы хирургия және гастроэнтерология.
Кездесу барысында оқу шарттары, жергілікті атқарушы органның гранттарын беру, сондай-ақ резидентурадан өтуге байланысты негізгі ұйымдастырушылық мәселелер талқыланды.
Алматы әкімдігі жыл сайын сұранысқа ие медициналық мамандықтар бойынша резидентурада тегін білім алу үшін гранттар бөледі. Бұл шара қалалық денсаулық сақтау жүйесінің қажеттіліктерін ескере отырып, білікті кадрларды даярлауға бағытталған.
Марат Пашимов жас мамандарды сапалы даярлаудың, олардың кәсіби тұрғыдан дамуының және Алматының денсаулық сақтау жүйесін өркендетуге қосатын алдағы үлесінің маңыздылығын атап өтті.