Қазақстанның халық әртісі, танымал театр және өнер қайраткері Рихангүл Махпирова 79 жасында дүние салды, - деп хабарлайды aqshamnews.kz тілшісі.
Өнер иесінің шығармашылық жолы 1977 жылы Құдыс Қожамияров атындағы республикалық мемлекеттік академиялық ұйғыр музыкалық комедия театрында басталған. Жарты ғасырға жуық еңбегінің нәтижесінде ол қазақ театр өнерінің алтын қорына енген талай әсерлі, көркем және есте қаларлық образдарды сомдады.
Өнер саласындағы зор үлесі үшін Рихангүл Махпироваға "Қазақстан Республикасының еңбек сіңірген әртісі" және "Қазақстанның халық әртісі" құрметті атақтары берілген.
ҚР Мәдениет және ақпарат министрлігі марқұмның отбасы мен жақындарына, сондай-ақ барша өнерсүйер қауымға қайғыра көңіл айтты.
"Еліміз көрнекті өнер қайраткерінен айырылды. Рихангүл Махпированың жарық бейнесі халық жадында мәңгі сақталады", – делінген ведомство хабарламасында.