Әрбір әскери корабльді жорыққа дайындаудың өзіндік ерекшеліктері бар.
Теңізге шығуды көздейтін қазақстандық әскерилер арнайы жаттығуға қатысып жатыр, деп хабарлайды Almaty-akshamy.kz.
«Әскери-Теңіз Күштері корабльдерінің, катерлері мен кемелерінің экипаждары орналасқан пунктерінде корабльдік оқу-жаттығуларды өткізуге кірісті. Арнайы К-1 курстық тапсырмасы кемені жүзуге дайындауды, базаның жағдайында жауынгерлік және күнделікті ұйымдастыруды пысықтауды қамтиды. Ол сәтті орындалған соң теңізге шығуға рұқсат беріледі», - делінген Қорғаныс министрлігі баспасөз қызметінің хабарламасында.
Корабльдердің экипаждары жауынгерлік міндеттерді орындаудан дағдыларын жетілдіріп, оның өміршеңдігі үшін күресуден, сондай-ақ радиациялық, химиялық және биологиялық қорғанудан нормативтерді пысықтайды. Диверсияға қарсы және әуе шабуылына қарсы қорғаныс шараларына да ерекше көңіл бөлінеді.
«Әскери-теңіз күштерінде курстық тапсырманы орындау – корабльдерді және қосымша кемелерді дайындау бағдарламасының маңызды кезеңі. Экипаждармен сабақтар ұдайы түрде өткізіледі, себебі әрбір әскери корабльді жорыққа дайындаудың өзіндік ерекшеліктері бар», – деп түсіндірді «Қазақстан» зымыран-артиллериялық кораблінің командирі 3-дәрежелі капитан Руслан Яхьяров.
Экипаждар даярлықтың келесі кезеңінде Каспий теңізінің қазақстандық секторында оқу-жауынгерлік міндеттерді орындайды.