ІІМ ел аумағына кіруге шектеу қандай жағдайларда қолданылатынын түсіндірді, деп хабарлайды aqshamnews.kz
Министрліктің мәліметінше, тексеру іс-шаралары кезінде көші-қон полициясы қызметкерлері шетел азаматтарының ел қауіпсіздігіне ықтимал қатер төндіруі мүмкін мән-жайларға назар аударады.
Атап айтқанда, Қазақстанға кіруге тыйым салынуы мүмкін жағдайлар:
ел заңнамасын бірнеше рет бұзу, оның ішінде әкімшілік немесе қылмыстық құқықбұзушылықтар жасау;
адамның экстремистік немесе террористік қызметке қатыстылығы туралы мәліметтердің болуы;
қоғамдық тәртіпті, ұлтаралық келісімді немесе конституциялық құрылысты бұзуға бағытталған әрекеттерге қатысу.
Шетел азаматтарын елге кіргізбеу туралы шешім "Халықтың көші-қоны туралы" ҚР Заңының 48-бабына сәйкес қабылданады.
ІІМ деректері бойынша, 2025 жылдың он айында ішкі істер органдарының қызметкерлері:
елден 14 мыңнан астам шетел азаматын шығарып жіберген;
шамамен 17 мың адамның елде болу мерзімін қысқартқан.