Дубайда (БАӘ) өтіп жатқан UAE SWAT Challenge халықаралық турнирінің бірінші күні Қазақстан командалары үшін сәтті өтті. 48 мемлекеттің 109 арнайы жасақ командасы қатысқан бәсекеде еліміздің төрт командасы да үздік ондыққа еніп, турнир кестесінің жоғарғы бөлігінен көрінді.
Дубайдағы тартысты сайыстың алғашқы күн қорытындысы бойынша Kazakhstan C командасы жалпы есепте бірінші орынға жайғасты. Одан кейін Kazakhstan D командасы екінші орыннан көрінді. Ал Kazakhstan B командасы төртінші орынға тұрақтаса, Kazakhstan A құрамасы оныншы орынға көтерілді. Осылайша Қазақстанның төрт командасы да алғашқы күннен-ақ үздіктер қатарынан табылып, жоғары нәтиже көрсетті.
Турнирдегі ерекше назар аудартқан жайттардың бірі – еліміздің Tomiris қыздар командасының көрсеткіші. Команда жалпы есепте 20-орынға орналасып, бұл нәтиже әйелдер командалары арасындағы ең үздік көрсеткіш ретінде аталды.
Қазақстан атынан қатысып жатқан құрамалар бір тудың астына ҚР Мемлекеттік күзет қызметі, ҚР Ұлттық қауіпсіздік комитеті және ҚР Ішкі істер министрлігі арнайы мақсаттағы бөлімшелерінің таңдаулы жауынгерлерін біріктірген. Бұл – тәжірибе мен кәсіби дайындық тоғысқан біріккен күштің нәтижесі.
Айта кетейік, бес күнге жоспарланған халықаралық турнир 11 ақпанда мәресіне жетеді. Алда әлі бірнеше кезең бар. Еліміздің командаларына қалған сындардан да сүрінбей өтіп, жеңіспен оралуын тілейміз.