2025 жылы Қазақстанда ел экономикасы үшін маңызды ірі инвестициялық жобалар іске қосылады. Бұл туралы Президент Қасым-Жомарт Тоқаевтың қатысуымен өткен Үкіметтің кеңейтілген отырысында Премьер-министр Олжас Бектенов мәлімдеді.
Алдағы уақытта құны $7,4 млрд болатын полиэтилен зауытының құрылысы басталады. Зауыт мұнай химиясы саласының дамуына ықпал етіп, елдің экспорттық әлеуетін арттырмақ. Сонымен қатар, Қазақстанның Даму банкінің қолдауымен Павлодар облысында алкилат шығаратын жаңа кәсіпорын салынады. Бұл жоба жанар-жағармай өндірісінің экологиялық стандарттарын жақсартады деп күтілуде.
Көмір химиясы саласында да ауқымды жобалар қолға алынуда. «Qarmet» акционерлік қоғамы жылына 200 мың тонна тас көмір шайырын қайта өңдейтін жобаны жүзеге асыруға кірісті. Жалпы құны $262 млн болатын бұл жоба көмір химиясы өнімдерінің 15 түрін шығаруды көздейді.
Сонымен қатар, Қытайдың China Energy компаниясы Қазақстанға $4 млрд көлемінде инвестиция салуға ниет білдіріп отыр. Қаражат көмірді терең өңдейтін зауыт салуға жұмсалмақ. Бұл жоба экологиялық талаптарды сақтай отырып, көмір химиясын терең өңдеу арқылы жоғары сапалы өнімдер шығаруға мүмкіндік береді.
Мұнай және көмір химиясы саласындағы осы жобалар Қазақстанның экономикалық әлеуетін арттырып, өндірістің әртараптануына және жаңа жұмыс орындарының ашылуына ықпал етпек.