Қазақстан тарихында алғаш рет халықтың 90 пайыздан астамы міндетті әлеуметтік медициналық сақтандыру (МӘМС) жүйесімен қамтылды, деп хабарлайды Aqshamnews.kz тілшісі Денсаулық сақтау министрлігіне сілтеме жасап.
Бұл көрсеткіш миллиондаған азаматтың кепілдендірілген әрі сапалы медициналық көмек пакетіне қол жеткізгенін білдіреді. Нәтиже Мемлекет басшысының тапсырмасымен жүргізілген жүйелі өзгерістер аясында іске асқан.
Айта кетейік, 2025 жылдың шілде айында МӘМС жүйесіне бірқатар жаңалық енгізген арнайы заң қабылданған. Заңның негізгі мақсаты – медициналық көмектің қолжетімділігін арттыру және әлеуметтік жағдайы төмен азаматтардың сақтандырудан тыс қалмауын қамтамасыз ету.
Жаңа нормаға сәйкес, 2026 жылдың қаңтарынан бастап жергілікті бюджет есебінен МӘМС жүйесіне қосымша 1 миллионға жуық адам қосылды. Олар әлеуметтік әл-ауқаты «дағдарысты» (D санаты) және «шұғыл» (E санаты) деңгейдегі азаматтар.
Министрлік мәліметінше, төмен табысы бар халықтың тағы 5 пайызы жоспарлы медициналық көмекке қол жеткізсе, тәжірибеде алғаш рет әкімдіктер жұмыссыз және әлеуметтік жағдайы қиын азаматтар үшін сақтандыру жарналарын өздері төлеу тетігі іске қосылған.
Ведомство бұл қадам медициналық қызметтің қолжетімділігін кеңейтіп қана қоймай, әлеуметтік теңсіздікті азайтуға бағытталған маңызды реформа екенін атап өтті.