Негізгі қызметіне футзалдан ішкі жарыстарды ұйымдастыру жатады.
Қазақстанда кәсіпқой футзал лигасы құрылды. Мұндай шешім ҚР футбол федерациясының қабырғасында өткен отырыста қабылданды, деп хабарлайды Almaty-akshamy.kz ҚазАқпаратқа сілтеме жасап.
Федерацияның баспасөз қызметінен мәлім еткендей, кеңес барысында елімізде футзалды дамыту мәселесі талқыланды.
Лига құру туралы шешімді футзалдан OLIMPBET-Қазақстан чемпионатының барлық клубы бірауыздан қолдады.
Лига президенті болып Қазақстан футбол федерациясы футзал департаментінің басшысы Асқар Әбілдаев сайланды.
Ұйымның негізгі қызметі футзалдан ішкі жарыстарды ұйымдастыру болмақ. Олар: OLIMPBET - ҚР чемпионаты, OLIMPBET - ҚР кубогы, OLIMPBET - ҚР суперкубогы, сонымен қатар барлық жас ерекшеліктері бойынша ел біріншіліктері (U-13, U-15, U-17).
Сондай-ақ кеңестің күн тәртібінде футзалдан Қазақстан Бірінші лигасын құру және жаңа маусымнан бастап футзал командаларын лицензиялауды енгізу мәселелері қамтылды.