Tеміржол көлігімен жүк тасымалы 10%-ға өскен.
Қазақстан Үкіметінің мәліметі бойынша, жүк тасымалы көлемі өткен жылмен салыстырғанда біршама артқан, деп хабарлайды Almaty-akshamy.kz.
«2022 жылдың алғашқы екі айында елімізде жүк тасымалы көлемі өткен жылмен салыстырғанда біршама артты. Атап айтқанда, теміржол көлігімен жүк тасымалы 10%-ға өсіп, 70,8 млн тоннаны, транзиттік жүктерді тасымалдау 20%-ға артып, 4 млн тоннаны құрады. Сонымен қатар, контейнерлермен тасымал 12%-ға ұлғайып, 174,7 мың жиырма футтық баламаға жетті», - делінген Индустрия және инфрақұрылымдық даму министрлігінің баспасөз қызметінің хабарламасында.
Жүк тасымалы көлемінің өскені туралы Үкімет отырысында Индустрия және инфрақұрылымдық даму министрі Қайырбек Өскенбаев айтып берді.
Министр өз баяндамасында биыл алдымызда теміржолмен жүк тасымалы көлемін 420 млн тоннаға, транзит тасымалдарды 24,5 млн тоннаға және контейнерлер транзитін 1,1 млн жиырма футтық баламаға жеткізу міндеті тұрғанын атап көрсетті.
Жалпы, еліміздің транзиттік-көліктік әлеуетін дамытудың негізгі көрсеткіштері «Қуатты өңірлер – ел дамуының драйверлері» ұлттық жобасында айқындалған. Соған сәйкес, 2025 жылға дейін Қазақстанда транзиттік тасымал көлемі 30 млн тоннаға дейін жетуі тиіс. Осы мақсатта теміржол инфрақұрылымын салу, жылжымалы құрамды жаңарту, жүктерді контейнерлендіру, балама бағыттар мен халықаралық дәліздерді дамыту бойынша шаралар қабылданып жатыр.