Теміржол желісін іске қосу отандық өнімнің экспортын ұлғайтуға бағытталған.
Қарағандыда ірі теміржол жобасының құрылысы басталды, деп хабарлайды Almaty-akshamy.kz Primeminister.kz сілтеме жасап.
Ұзындығы 836 км жаңа теміржол желісін іске қосу отандық өнімнің экспортын ұлғайтуға бағытталған. Құрылыс барысында 419 құрылыс нысаны - 5 ірі көпір, 87 шағын және орта масштабтағы көпір, 288 су жүргізу құбыры, 14 автожол өткелі жүргізіледі. Құрылысты толық аяқтау 2025 жылдың 4-тоқсанына жоспарланған.
Жұмысты іске қосу рәсіміне Премьер-Министр Әлихан Смайылов онлайн режимде қатысты.
Өз сөзінде Үкімет басшысы осындай стратегиялық маңызы бар жоба Мемлекет басшысының тапсырмасы бойынша іске асырылып жатқанын және республиканың көлік-транзит әлеуетін дамытуда маңызы зор екенін атап өтті.
Премьер-Министрдің айтуынша, соңғы бес жылда елімізде транзитпен контейнер тасымалдау көлемі 4,4 есе өсті, биылғы 10 айда экспорттағы жүк айналымы 74 млрд тонна-километрден асты. Бұл өткен жылмен салыстырғанда 11%-ға артық.
Теміржол саласында бірқатар ірі инфрақұрылымдық жобаларды іске асыру туралы шешім қабылданды. Олардың ішінде Достық – Мойынты, Бақты – Аягөз, Дарбаза – Мақтаарал, Алматы маңындағы айналма жолдары бар.
«Міне, бүгін соның бірі әрі ірі жоба Достық – Мойынты екінші теміржол құрылысын бастағалы тұрмыз. Бұл жоба осы бағытта өткізу мүмкіндігін 5 есеге арттыруға мүмкіндік береді және экспорттық тасымал мәселесін толық шешеді», деді Әлихан Смайылов.
Жобаны іске асыру кезінде 80%-ы Қазақстанның үлесіне түседі. Яғни, шпалдарды, рельстерді, трансформаторларды жасауды, инертті материалдарды, құм мен қиыршық тасты жеткізуді жергілікті компаниялар жүзеге асырады. Сондай-ақ құрылысқа 3 700 адам жұмылдырылмақ, ал теміржол желісі пайдалануға берілген кезде 500 адам тұрақты жұмысқа орналастырылады.
Ресми шараға орталық және жергілікті мемлекеттік органдар мен бірқатар қазақстандық ірі компания өкілдері, теміржолшылар мен сала ардагерлері қатысты.