2026 жылдың басынан бері Астана қаласы мен бірнеше өңірде жүргізуші куәліктерін беру және мемлекеттік қызмет көрсету саласында ірі сыбайлас жемқорлық схемалары анықталды. Тергеу барысында 100 млн теңгеден астам заңсыз сыйақыға қатысты ондаған дерек тіркелген, – деп хабарлайды aqshamnews.kz тілшісі.
Қазақстанда сыбайлас жемқорлыққа қарсы күрес аясында мемлекеттік қызмет көрсету саласындағы заңбұзушылықтар әшкереленіп жатыр.
2026 жылдың басынан бері Астана қаласы, Ақмола және Павлодар облыстарында автомектептердің қызметін ұйымдастыру және жүргізуші куәліктерін рәсімдеу кезінде заңсыз әрекеттер тіркелді. Атап айтқанда, пара алу және қызметтік өкілеттіктерді теріс пайдалану дерегі анықталған.
Астанада Мамандандырылған халыққа қызмет көрсету орталығы басшысының бұрынғы орынбасары азаматтарға жүргізуші куәлігін алуға көмектесу үшін жүйелі түрде пара алып отырғаны белгілі болды. Ол емтихан тапсыру процесін заңсыз жолмен жеңілдетіп отырған.
Жалпы алғанда, 100 млн теңгеден асатын 60-тан астам сыбайлас жемқорлық дерегі процестік түрде құжатталған.
Сонымен қатар, Көкшетау қаласындағы Мамандандырылған ХҚКО мен Екібастұз қаласындағы «Азаматтарға арналған үкімет» мемлекеттік корпорациясы филиалдарының басшылары да заңсыз әрекеттері үшін жауапкершілікке тартылуда. Олар жалған тұлғалар арқылы емтихан тапсыруды ұйымдастырып, ақшалай сыйақы алған.
Бұдан бөлек, Астана, Шымкент және Тараз қалаларындағы осы корпорация филиалдарында жылжымайтын мүлікті қайта тіркеу кезінде қызметтік өкілеттіктерін теріс пайдалану және заңсыз баю деректері анықталған.
Бұл деректер бойынша соталды тергеп-тексеру жүргізілуде. Қылмыстық-процестік кодекстің 201-бабына сәйкес, өзге ақпарат жария етуге жатпайды.