Жоба араб инвесторларымен бірлесіп іске асырылады.
Бұл туралы «Ұлттық аграрлық ғылыми-білім беру орталығының» төрағасы Дархан Балпанов айтты, деп хабарлайды Almaty-akshamy.kz.
Бүгінгі таңда елімізде екі генетикалық зертхана бар. Онда қой тұқымын асылдандыру жұмысы жүргізіледі. Қазақстандағы қой етіне араб елдерінің қызығушылығы зор. Ал еліміздің бұл тұрғыда әлеуеті үлкен. Ендігі жылдан бастап араб елдерімен бірге қосылып, 2 млн еуроға бағаланған зертхана құрылмақ.
«Жалпы, стратегия бойынша, ғылыми институттың деңгейін көтеріп, фермерлерге ұрықтандыру технологияларын жеткізу ойымызда тұр. Ал жүнге елімізде сұраныс болмаса да, шетелде сұраныс көп. Сондықтан селекция жұмыстарын атқару керек. Ол жұмыстар да ғылыми институттарымызда жүргізіліп жатыр. Біздің мақсатымыз – селекцияны дұрыс ұйымдастырып, тиімді нәсілдер шығарып, сол мәселені фермерлерге жеткізу. Ал мемлекет тарапынан өнімді шетелге шығарудың мүмкіндіктерін іздеу маңызды», - дейді «Ұлттық аграрлық ғылыми-білім беру орталығының» төрағасы Дархан Балпанов.
Көрмеге әлемнің 20 елінен 300 ден астам компания қатысады. Орталық Азиядағы ең ірі көрме ертең ЭКСПО көрме кешенінде өтеді. Екі бөліктен тұратын жәрмеңкенің бірі мал шаруашылығына арналса, "Қаз Агро" көрмесі елдегі тұқым шаруашылығынан бастап, ұн өндірісін де қамтиды. Саланың озық технолгиялары таныстырылатын алаң отандық шаруалар үшін тәжірибе алмасуға таптырмайтын мүмкіндік, - дейді мамандар.