Қазақстанда электромобильдерге арналған бөлек түсті мемлекеттік нөмір енгізілуі мүмкін, деп хабарлайды Aqshamnews.kz тілшісі.
Мәжіліс отырысында Ішкі істер министрінің орынбасары Санжар Әділов ведомство бұл бастаманы қолдайтынын айтты. Оның сөзінше, электр көліктеріне өзгеше түсті нөмір беру әлемдік тәжірибеде бар. Көп елде мұндай нөмірлер жасыл түспен белгіленеді.
«Бұл мәселе пысықталды, біз қолдаймыз. Заң қабылданғаннан кейін тиісті заңға тәуелді актілер әзірленіп, бекітіледі. Содан кейін жаңа нөмірлер ел бойынша енгізіледі», – деді Санжар Әділов.
Депутат Арман Қалықовтың айтуынша, электромобильдер туралы заң күшіне енгенімен, оларды қарапайым көліктерден ажыратуда бірқатар әкімшілік қиындық бар. Мәселен, техникалық бақылау құралдары электромобильді бірден тани алмайды. Бұл ақылы автотұрақ, қуаттау станциялары, ерекше қорғалатын табиғи аумақтарға кіру сияқты жағдайларда маңызды.
Осыған байланысты Мәжіліс комитеті электромобильдерге арналған мемлекеттік нөмірлердің түсін бөлек белгілеуді ұсынған.